PENTINGNA NGALESTARIKEUN KARAKTER BUDAYA SUNDA
Wendi Cahya Setiadi
XII IPA 4
Sunda asalna tina kecap Su nu artina Alus, atawa sagala anu ngandung unsur kaalusan. Urang sunda ngabogaan karakter nyaeta cageur, bageur, bener, singer, jeung pinter nu geus dibawa ti jaman Salaka Nagara nepi ka Pakuan Pajajaran, nu mawa kamakmuran leuwih ti 1000 taun lilana.
Sunda mangrupakeun kabudayaan masyarakat di wilayah kulon pulau Jawa, tapi dina perkembangan jaman ayeunamah geus nyebar di sakabeh penjuru dunia. Ti mimiti nepi ka ayeuna, budaya sunda geus mangrupa hiji budaya luhur di Indonesia. Tapi, modernisasi jeung abusna budaya luar ka Indonesia beuki dieu bakal beuki ngurangan kaluhuran budaya Sunda.
Sunda ngabogaan kecap nu luhur pisan nyaeta cahaya, bodas atawa bersih. Makna kecap sunda eta salain ditingali tina panampilan, tapi oge direnyepan ku hate. Ku sabab eta, urang sunda nu “nyunda” kudu ngabogaan hate nu luhur oge.
Satiap bangsa ngabogaan etos, kultur, jeung budaya anu beda. Tapi teu nutup kamungkinan mun aya bangsa nu hayang nerapkeun etos budayana keur bangsa lain. Sabab, manehna ngabogaan anggapan, yen etos jeung kultur budayana boga kaleuwihan. Hal ieu bisa katingali tina etos jeung kultur budaya bangsa urang, sabab dina dekade ieu urang geus eleh atawa katindes kubudaya sejen. Arus modernisasi ngagempur budaya nasional nu jadi jati diri bangsa. Budaya nasional ieu ayeunamah katingali kuno pisan, leuwih parahna, aya generasi muda nu era keur diajarna. Misalna, teu hayang ngabogaan elmu kasenian tradisional sabab dianggap teu boga manpaatna. Rasa bangsa beuki kahapus, sabab budaya bangsa sejen leuwih katingali mencrangna. Kaayaan ngaprihatinkeun ieu oge kajadian ka budaya sunda, sahingga urang sunda kaleungitan jati dirina.
Keur ngahareupan karuksakan kabudayaan Sunda, aya alusna urang ngalengkah ka tukang heula. Diajar jeung ngumpulkeun pasir mutiara nu paburantak ieu. Loba omongan bijak jeung khazanah omongan nenek moyang jadi karatan, kusabab can pernah kacabak kunubogana. Hal ieu disababkeun euweuh kasadaran keur diajar, jeung loba anggapan katinggaleun jaman. Sabenerna mun urang diajar etika moral sunda, eta the ngabogaan khazanah hikmah anu alus pisan. Hal ieu bisa katingali tina tradisina.
Ayeuna tinggal urang ngatafakuran karakter urang sunda. Cageur nyaeta kudu sehat jasmani jeung rohani, sehat mikirna, sehat pendapatna, sehat lahir jeung batinna, sehat moral, sehat kalakuanna, jeung ngajauhkeun tina sifat suudzon. Bageur nyaeta alus hate, nyaah ka babaturan, loba mere pendapat jeung kaedah moral atawa materi anu alus, teu pelit, teu emosional, sok nolongan batur jeung ihklas tara menta balesan. Bener nyaeta tara bohong, teu asal-asalan tina ngerjakeun tugas, amanah, lurus tina agama, bener dina mimpinna, jeung teu ngaruksak alam. Singer nyaeta loba mawas diri tapi lain was-was, ngarti kana satiap tugas, ngautamakeun batur salain diri pribadina, pinter ngahargaan pendapat batur, teu gancang ambek mun dikritik tapi diterima jeung dipikaran makna saenyana. Pinter nyaeta pinter elmu dunia jeung akheratna, pinter ngabereskeun masalah kucara adil jeung bijak, jeung teu ngarasa dirina pinter sorangan bari ngahina batur.
Jadi, tinggal ayeuna urang salaku urang sunda, kudu ngabogaan watak atawa karakter urang sunda tea nyaeta cageur, bageur, bener, singer jeung pinter, kusabab kucara eta urang bisa mertahankeun budaya urang sunda, sabab kusaha deui bangsa sunda di jaga jeung dilestarikeunna salain ku urang sunda soranganmah!!
Categories:
sunda